احنا اللي قتلنا خالد سعيد

خالد سعيد شاب مصري زي ملايين الشباب المصري البسيط ، بيدخل علي الانترنت وبيتفسح مع صحابه وبيعيش زي ما احنا عايشين كل يوم ، خالد واحد مننا احنا ، نظام حياته زي نظام حياتنا ، لم يكن مجرم او بتاع مشاكل ، شاب مصري عادي جدا

فجأة خالد ألقي به القدر في يد هؤلاء المجرمين القتلة ..... 20 دقيقة فقط ... انتهت بسحل وقتل خالد لأنه رفض انهم يفتشوه بالطريقة المهينة دي وانهم يسبوا امه وابوه بالالفاظ الجارحة دي

خالد مات .. عارفين ليه .... عشان في ناس كتير بيحصل معاهم زي اللي بيحصل مع خالد وبيسكتوا خايفين ، عشان في ناس كتير قبل خالد اتقتلت ومحدش طالب بالقصاص ليهم ومحدش دور علي حقهم ، وفي ناس كتير اتقتلت قبل كدا بنفس الطريقة ومحدش حس بيهم

دلوقتي الفضيحة بانت والجريمة مكتملة الأركان ، دلوقتي كل واحد فينا ممكن يبقي خالد ، محدش فينا في امان ، محدش فينا ممكن يتخيل ان دا بعيد عنه ، دا قريب وقريب جدا ، خالد هو واحد مننا ، انا وانت .... لازم نصحي كفاية خلاص ، الجريمة يجب الا تمر

عشان نحمي نفسنا وولادنا واخواتنا واهلنا ان دا ما يحصلش ليهم ، لازم نقف وقفة بجد ، تخلي المجرمين تخاف ، احنا 80 مليون مصري وهما قلة بتسيطر علينا ، لازم نقولهم اننا مش هنخاف ، بعد النهاردة احنا مش خايفين ، وهما اللي لازم يخافوا مننا ، لأننا هنطالب بحقوقنا ومش هنسيب اي مجرم يفلت من العقاب
دم المصريين مش رخيص ، دم خالد في رقبة كل مصري ، لينا تار مش هيسقط مع المجرمين

عشان دم خالد وعشان حياتنا واماننا وكرامتنا

مش هنسكت
بعلو الصوت هنتكلم
وان شاء الله نموت
هنتكلم