رسالة للريس ..من مواطن في دايرة الريس

سيادة الريس ...مساء الفل والأنوار يا فندم ، هدخل علطول في الموضوع عشان وقت حضرتك ضيق ، انا مواطن من البني أدمين اللي عايشين في البلد دي ، وحظي اني ساكن في دايرة سيادتك ، دايرة مدينة نصر ومصر الجديدة اللي الناس بتحسدها وبتقول دي دايرة الريس ، واكيد متروقة أخر حاجة

يا فندم مش هكلمك علي المجاري اللي كل شوية بتطفح في مدينة نصر ولا بركة المية الموجودة من حوالي شهرين عند مدخل الاوتوستراد جنب منزل كوبري ألماظة اللي جاي من طريق المطار وبيوقف كل العربيات الصبح حبة كويسين عشان العربيات تعدي ببطء علي المية اللي مش بتنشف بقالها شهرين ، ولا هكلم سيادتك علي المية اللي بتقطع كل سنة في الصيف في مدينة نصر ياليوم وباليومين والتلاتة والاربعة والناس المتحاملين الوحشين بيقولوا انها بتروح عشان تسقي ملاعب الجولف اللي في القطامية والكومباوندات الجامدة بتاعة الناس المهمة في التجمع الخامس

ومش هكلم حضرتك ابدا عن زحمة ش مصطفي النحاس ولا عباس العقاد ولا طريق النصر عشان الزحام دا بقي طبيعي في مصر كلها والكلام فيه رفاهية وعيب ما يصحش من ولاد البلد الوطنيين ، ومش هجيب سيرة ترام مدينة نصر القديم اللي كان بيركبه الغلابة من رمسيس والمطرية وبيدفعوا تذكرة بربع جنيه وخلاص فجأة بقي بح ، مفيش تروماي بس لسه القضبان بتاعته موجودة مش عارف ليه؟؟؟

ومن المؤكد اني مش هتكلم علي عزبة الهجانة اكبر تجمع عشوائي بالقاهرة اللي وسيلة المواصلات فيها هي العربية نصف النقل اللي بيقع منها العيال الصغيرة وهم بيتنططوا عشان يروحوا المدرسة اللي السور بتاعها مكسور وفيها ناس وحشين ياي ياي بيبيعوا مخدرات في الحوش وكل يومين يشدوا بنت صغيرة ويعتدوا عليها ، اما بقي الشوارع المكسرة والحفر البسيطة جدا اللي بتكسر كل يوم عشرات العربيات وتبوز عفشتها دي برده حاجة خفيفة ما يصحش نضيع وقت حضرتك فيها

وعيب فعلا ان الواحد يتكلم علي الناس الغلابة اللي بيشوفهم كل يوم بيدوروا في صناديق الزبالة عن بقايا أي أكل عشان يسدوا جوعهم ، اما الناس اللي بتسيء للوطن وصورته الحضارية وقعدت علي مفارق الطرق ورافعين 2عصاية في 2 تورناية صفيح فيها رمل وشادين عليهم قماشة وعاملينها زي الخيمة المفتوحة من كل حتة وقاعدين يبيعوا مناديل وبيناموا في نفس المكان في عز البرد ، الناس دي فعلا ملهاش حق وشقق سيادتك بتاعة المشروع الانتخابي مش لاقية حد يشتريها او يدفع قسطها الشهري البسيط اللي بيبدأ من 800 جنيه بس بعد مقدمة 20 ألف جنيه برده بس !!!

انا بقي ياريس مواطن بسيط ، أهلي ربوني وعلموني في مدارس حكومة لغاية ما بقيت دكتور مفروض اعالج الناس ، معلش يا ريس انا بصراحة سبت وزارة الصحة بدري بدري وما رضيتش اشتغل فيها عشان ما اعملش عبء عليكم وانا باخد منكم شهريا 250 جنيه ، قلت اهو ينفعوا البلد في حاجة تانية ورحت اشتغل حر ، ودكتور كام يوم وبقلب عيشي بقية الايام وربنا ساترها ، انا زي الملايين يا ريس من ولاد البلد دي ، اللي بيتقال عليهم ولاد الطبقة المتوسطة او ما تبقي من الطبقة المتوسطة ، مالناش طموح كبير في فلوس ولا اي حاجة ، مش عايزين غير الستر

علي فكرة ياريس قبل ما اكتبلك الرسالة دي فكرت اتصل بمكتب الرئاسة واشكي ليه بس للاسف تليفون بيتنا بايز من 7 شهور ، والسبب بسيط ان الشركة المصرية للاتصالات وزعت علينا تليفونات هوائية بشاحن كهربي ، والشاحن باز لوحده والله يا ريس ، وبقالي 7 شهور بروح السنترال اطلب اشتري منهم شاحن عشان التليفون يشتغل ، يقولوا لي مفيش ، احنا مش بنعمل قطع غيار ، نصيبك كدا ، قدم علي تليفون جديد احسن لك وقدمت كذا شكوي ولكن كلهم مطلعين لسانهم ليا يا ريس وبيقولوا لي اتكلم في الموبايل

انا استحملت ياريس وبقيت بتكلم في الموبايل وخلاص وساعات كلمني شكرا وقلت مش مشكلة لازم نقف مع البلد في ازمتها ، ايه يعني تليفون منزلي ، ياكش تولع كل التليفونات بس ما نسيحش للبلد وللحكومة و الشركة المصرية للاتصالات اللي بتسرقنا كلنا وبتحاسبني علي فواتير واشتراك وانا معنديش تليفون عشان هما مش بيعملوا قطع غيار ومفروض اقدر دا

كل دا بقي كوم يا ريس واللي جاي كوم ، يا ريس بقالي 3 ايام مفيش في بيتنا انبوبة بوتاجاز ، تخيل يا فندم ، 3 ايام الانبوبة خلصت ومش لاقي حد أغيرها من عنده ، شلتها علي دماغي ورحت المستودع ، قالوا لي مفيش ، ، وانا للاسف زي ناس كتير في الدايرة وفي مصر معندهمش غاز طبيعي ، سألت هو في ايه ؟ طلع ان في ازمة انابيب بوتاجاز كبيرة ضاربة البلد كلها وسعر الانبوبة وصل لثلاثين جنيه في السوق السودا ، ويا شطارتك لو لقيتها ، يرضيك ياريس كدا ؟؟ مش عارف اكل اي حاجة في البيت ومعيش فلوس اكل بره ، حتي الشاي يا ريس مش عارف اشربه ، صحابي المشاغبين بيقولوا غالبا المحبس اللي بيوصل الغاز لاسرائيل باز وطلع غاز مصر كله لاسرائيل ومبقاش عندنا لا غاز طبيعي ولا غاز بوتاجاز وبيقولوا كمان ، اننا هنستورد غاز من بره ، بصراحة ياريس واعذرني قلت لهم كلمة اسكندراني استنكارية وهما بيقولوا ان الحكومة ناوية تستورد غاز من بره عشان ما تحصلش الازمة دي تاني ، معقول ياريس ، نصدر الغاز لاسرائيل ونشحت من الدول التانية ؟؟

بقيت بسمع زغاريد متقطعة علي فترات طويلة ، سألت ، قالوا لي دا واحد عرف يجيب انبوبة واهله فرحانين ، بصراحة ياريس مش عارف انا لو الوضع دا طول هعمل ايه ؟ طيب حتي لو رحت اشتريت بابور جاز هجيب الجاز منين ؟؟ طيب سبرتاية ، هجيب السبرتو منين ؟ مش عارف يا ريس لو الوضع كدا طول انا ممكن اتجنن واجي اعمل مظاهرة لوحدي جنب بيتكم ، قصدي قصر العروبة ، طبعا انا بكتب من عشمي واحنا ولاد دايرة واحدة ، وطبعا ياريس انت عارف اني مدون والعيال المدونين دول متصيتين ، ويعرفوا ناس كتير ، يعني ممكن يقفوا مع حضرتك وقفة صح في انتخابات مجلس الشعب الجاية لو قررت تدخلها في الدايرة بتاعتنا بعد ما الاستاذ جمال يمسك الحكم وحضرتك تقرر انك تستمر تخدم الناس برده من خلال مجلس الشعب

عموما ياريس الجيرة برده لها حقوقها واكيد هتأمرهم يرشوا علي مدينة نصر كام انبوبة تفك ازمتنا ، زي أزمة العيش لما عملوها الرجالة وعملولنا اكشاك لبيع العيش المعجن اللي فيه طوب ورمل بس كانت وقفة جامدة من حضرتك معانا ، بوعدك يا ريس مش هاكل كتير ، هو الغدا بس وكوباية شاي واحدة بس عشان الانبوبة تقعد عندنا 3 شهور وما نتعبش سيادتك معانا

انبوووووووووووووووووووووووووبة يا ريس