الناس اللى قاعدة تتريق على أطفال شبرا الخيمة امبارح اللى حولوا نافورة ميدان المؤسسة الى حمام سباحة ونزلوا يعوموا فيها والناس اللى بتنشر صور الشباب اللى رقصوا امبارح فى شارع جامعة الدول العربية بالمهندسين ولابسين شورتات بس ، الناس اللى قاعدة تقول يع ايه القرف دا والشاب الرقيق اللى كاتب انا خلاص مش عايز اعيش فى البلد دى والبنت الكيوت اللى كاتبة دا شكله غزو فضائى حصل لمصر والكائنات دى جت منين ؟
الحقيقة ان الأطفال الغلابة اللى بينزلوا كل عيد يعوموا فى نافورة أى ميدان مش مشتركين فى نادى ولا يقدروا يروحوا الساحل ولا أى مصيف زى حضرتك ولو كانوا لقوا فرصة أكيد مكنوش هينزلوا يلعبوا فى مية النافورة أما الشباب اللى ظهر امبارح فى المهندسين وعمل شو خاص بيه أثار اشمئزاز حضرتك فدول برده مغلوبين على أمرهم وبيعبروا عن فرحتهم ومرحهم بطريقتهم وامكانياتهم المتواضعة ، ممكن تشوف ان دا عمل عشوائى وبيئة وكان نفسك تشوف كرنفالات رقص راقية فى الشوارع زى بلاد بره لكن يا سيدى دى ثقافتهم وطريقتهم وأخر علامهم ، وأكيد مش هيقدروا يحضروا حفلة (اجلاسيس ) فى (جولف بورتو مارينا) ولا عمرو دياب وغيرهم ، فبدل ما نتريق على الغلابة والبسطاء ونقول يع نفكر هنعمل ايه فى البلد دى عشان تتقدم والغلابة فيها يعيشوا حياة أدمية ، علما ان الحق فى الترفيه من حقوق الانسان الطبيعية مهما كان مستواه الاجتماعى والمادى ، بلاش تحسسونا اننا عايشين فى غابة طبقية محدش فيها بيحس بالبسطاء ، كل واحد فقير ومحتاج ومش لاقى ذنبه فى رقبتنا كلنا وهنتحاسب عليه ولو مش مقتنع بكدا ففكر تفكير مادى بحت أساسه ان محاربة الفقر ومساعدة الناس على الارتقاء بيحميك ويحمى المجتمع من انفجار وكراهية محدش يقدر يواجهها ، كل سنة وانتم طيبين وكل سنة واحنا بنحس بالناس أكتر